Gullid mitt
Mitt svæði

Upplýsingar

Ferlið

Hjá okkur er þetta einfalt.

  1. 01

    Þú bókar bás

    Þú bókar bás í 7, 14, 21 eða 28 daga. Þegar bókun er lokið og greiðsla hefur borist færðu tölvupóst með aðgangsupplýsingum að „Mínu svæði“, þar sem þú getur hafið skráningu á vörunum þínum.

  2. 02

    Skráning á vörum

    Þegar þú hefur skráð þig inn á „Mitt svæði“ á gullidmitt.is skráirðu vörurnar þínar og verðleggur þær á því verði sem þér þykir sanngjarnt. Farðu í „Products“, smelltu á „Add“ og fylltu út upplýsingarnar fyrir hverja vöru.

    Skráðu greinargóða lýsingu, til dæmis „Hvít samfella“ eða „Svartir Nike skór“, ásamt stærð, básanúmeri og verði.

    Básanúmerið kemur sjálfkrafa inn í vöruleitina út frá skráningunni, svo þú þarft ekki að setja það í vöruheitið.

  3. 03

    Skráning bankaupplýsinga

    Til að við getum greitt þér söluhagnaðinn þarftu að skrá bankaupplýsingar. Það gerirðu í notendastillingum á „Mínu svæði“ með því að slá inn banka, höfuðbók og reikningsnúmer.

    Við leggjum söluhagnaðinn inn á reikninginn þinn, að frádreginni 20% söluþóknun, innan 72 stunda frá því að leigutímabilinu lýkur.

    Athugaðu að ekki er hægt að greiða út söluhagnað fyrr en bankaupplýsingar hafa verið skráðar.

  4. 04

    Upphaf leigutímabils

    Þér er velkomið að koma klukkan 17:00 daginn áður en leigutíminn hefst, eða þegar við opnum fyrir básaleigendur fyrsta dag leigutímans.

Innifalið í leigunni

  • Herðatré
  • Perlur til að merkja stærðir
  • Þjófavarnir (ótakmarkað fyrir vörur yfir 1.800 kr.)
  • Verðmiðar (límmiðar)
  • Merkimiðar (pappamiðar fyrir merkibyssu)
  • Létt þrif í básnum á meðan leigutíma stendur

Starfsfólk okkar fer 2–3 hringi á dag um verslunina og lagar til í básnum ef þörf er á. Ef þú hefur séróskir erum við alltaf til taks í afgreiðslunni.

  1. 05

    Myndatökur

    Við hvetjum alla seljendur til að taka myndir af sem flestum vörum, enda er góð vöruleit á gullidmitt.is. Þú getur líka deilt myndunum á sölusíðuna okkar á Facebook, „Vörur til sölu – Gullið mitt“, til að auka sýnileika varanna.

  2. 06

    Verðbreytingar og afsláttur

    Þér er frjálst að breyta verði hvenær sem er á meðan leigutímabilinu stendur. Farðu inn á „Mitt svæði“ á gullidmitt.is, veldu „Products“ og síðan vöruna sem þú vilt breyta. Nýja verðið skilar sér alltaf til kaupanda, hvort sem nýr verðmiði er settur á vöruna eða ekki.

    Þar sem allar vörur eru merktar með strikamerki, lýsingu og verði þarf að prenta nýjan miða og setja á vöruna svo rétt verð komi fram á merkingunni.

    Viljir þú gefa afslátt af öllum vörum í básnum þínum er best að hafa samband við okkur í afgreiðslunni eða í tölvupósti á gullidmitt@gullidmitt.is.